Bag-ong Sakit sa Kanding Hugot nga Gibantayan sa Provincial Veterinary Office

     Usa ka bag-ong sakit sa kanding ang hugot nga gibantayan sa mga personahe sa Provincial Veterinary Office nga gitawag og Caprine Athritis Encephalitis (CAE) Virus. Ang timailhan kon sintomas sa maong virus mao ang mga mosunod:

     1. Paghubag sa mga luatan;

     2. Pagluya sa lawas;

     3. Walay gana sa pagkaon.

     Nahibaloan sa Tandag FITS Center nga ang maong sakit sa kanding kusog makatakod sa lain pa nga mga kanding, ilabina gyod kung nagsuso pa kini. Ang maong virus wala pa gayod tambal ug bakuna nga nadiskobrehan hangtod sa pagkakaron. Ang tanan kanding nga matakdan sa maong virus angay na gayod pagapatyon dayon ug pagasunogon. Mao kini ang gibutyag ni Dr. Gervacio Yparraguirre, ang Provincial Veterinarian sa Probinsya sa Surigao del Sur. Dugang pa ni Dr. Yparraguirre, aduna na mga kanding ang nagpositibo sa Caprine Athritis Encephalitis Virus didto sa Munisipyo sa Tagbina.

     Kalakbit niini, adunay nahitabo nga panagtigom sa tanan mga Provincial ug City Veterinarians sa tibook Caraga Region sa Tandag sa milabay nga Nobembre 9, 2010. Ang maong panagtigom, ubos sa Mindanao-Visayas Caprine Athritis Encephalitis Control Project (MinViCAECoP). Sa maong panagtigom, gibutyag ni Dr. Rafael T. Mercado, Coordinator, MinViCAECoP, ang mga pamaagi sa pag-ila sa maong virus ug unsaon pagcontrol niini. Nahibaloan usab sa Tandag FITS Center, nga aduna na mga checkpoint alang sa pagsumpo sa pagkaylap sa maong virus.