Mga Mag-uuma sa Probinsya Mikuyog sa Lakbay-Aral sa Misamis Oriental

     Baynte dos ka mga mag-uuma ug agricultural technicains gikan sa nagkalain-lain nga munisipyo sa probinsya sa Surigao del Sur ang mikuyog sa duha ka adlaw nga Lakbay-Aral sa milabay nga Nobembre 10-11, 2010 didto sa Gingoog City ug Lagunglong, Misamis Oriental. Ang naasoy nga Lakbay-Aral, mahitungod sa Integrated Rice-Duck Technology. Ang Rice-Duck Technology, usa ka organikong pamaagi sa pagpanguma sa humay nga dili na mogamit og mga pestesidyo ug sintetiko nga mga abono. Sa naasoy nga teknolohiya, buhian ang mga pato sa umahan sa humay sa ensakto nga panahon aron kini makahatag og dako nga kaayohan. Ang mga pato, makatabang sa pagdumala sa mga sagbot sa umahan pinaagi sa pagkaon sa mga liso sa sagbot ug sa pagkaon ug pagtamak-tamak sa mga miturok na nga mga sagbot. Makatabang usab ang pato sa pagsumpo sa nagkalain-lain nga peste kon dangan sa umahan pinaagi sa pagkaon niini. Sa laing bahin, ang mga giod sa pato kusog makapalagsik sa tanum nga humay ug ang mga iti niini, maayo nga organikong abono sa atong umahan.