Mass Graduation sa Farmers' Field School Gihimo sa Gamut, Tago

     Mokabat sa 87 ka mag-uuma ang malamposong nakatapos sa upat ka bulan nga pagbansay-bansay kon training sa Farmers' Field School nga naglangkob sa tulo ka barangay sa Bajao, Cabangahan ug Gamut sa munisipyo sa Tago. Ang naasoy nga training nagatudlo sa pagdumala sa humay ginamit ang mga pamaagi nga dili makadaut sa kinaiyahan.

    Ang maong pagtapos sa sa mga mag-uuma sa Farmers' Field School nahitabo didto sa Barangay Hall sa Gamut, munisipyo sa Tago, adlaw sa Biyernes, petsa 5 sa Nobembre 2010. Gitangbungan kini sa mga haligi sa lungsod sa Tago nga sila Mayor Henrich Pimentel, Bise Mayor Alex Bautista, SB Member ug Chairman sa Committee on  Agrriculture, Al Espinosa ug sa tulo ka mga kapitan sa naasoy nga mga barangay. Sa maong okasyon, si Provincial Agriculturist Marcos M. Quico, mihagit sa mga mag-uuma, alang sa malahutayong pagpanguma.

     Ang Farmers' Field School usa ka makanunayong kalihokan sa buhatan sa Provincial Agriculturist nga inabagan sa Department of Agriculture-Caraga Region.

     Sa Nobembre 12, 2010, adunay laing hugpong sa mga mag-uuma sa lungsod sa Carrascal ang malamposong makahuman sa maong kalihokan. Sumala kang Ms. Flor Pante, ang Provincial IPM Coordinator, aduna pay dugang 23 ka hugpong sa mga mag-uuma gikan sa nagkalainlain nga munisipyo sa probinsya sa Surigao del Sur ang kasamtangan nga nagbansay-bansay ubos sa Farmers' Field School.